فيديو .. حسام حسن : الإعلام الأحمر يدارى على فساد الأهلى .. وجماهير الزمالك "مطحونة"

19 ديسمبر 2011 الساعة 12:27 صباحا

كتب - أسامة صديق :

حل الكابتن حسام حسن المدير الفنى السابق لناديى الزمالك والاسماعيلى ، ضيفا على برنامج "الملاعب اليوم" على قناة الحياة،ويقدمه الإعلامى سيف زاهر.

حيث أكد العميد أن فترة توقف الدورى أفادت عدد من المدربين،وإن كانت ضرت الكره المصرية ومدربين أخرين من ناحية أخري،مضيفا بأن الأندية الكبري ستعاني بسبب توقف الدورى.

وقال " كنت اتمني استمرار الدوري ،لان فترة توقف 35 يوم مش بتحصل في اى مكان، لانها فترة كبيرة وبتضر الفرق الصاعدة،مثل المصري والمقاولون، لانه بيكونوا بذلوا مجهود كبير وفي طريقهم للصعود، وكمان بيحمل المدير الفني لأى فريق اعباء كبيرة في التدريبات المختلفة".

وعن المستفيدين من توقف الدورى قال " الفرق صاحبة العدد الكبير من الاصابات استفادت من فترة التوقف، والمدرب اللى اتأخر فى فترة الاعداد استفاد هو كمان،واللي حقق نتائج سلبية لدية فرصة فى مراجعة اموره".

وضرب العميد مثالا على ذلك، بفترة توليه مهام فريق الزمالك، حيث كان لديه فارق 8 نقاط، وكان مانويل جوزية المدير الفني للنادي الاهلي عائدا للفريق لتوه ،بعد فترة غياب، وكان الوقت لا يسمح له بتدريب اللاعبين بالشكل الكافي، وجاءت احداث الثورة لتعطية فرصة اعادة تاهيل الفريق،من خلال تدريبات وماتشات ودية،ليعود أفضل من الزمالك.

وأضاف حسام حسن " فترة التوقف بتخلي اللعيبة تدور فى الملفات القديمة، وتطالب بمستحقاتها، لكن فى حال استمرار الدورى بيكون اللاعب تحت ضغط جماهيرى،وما عندوش وقت يفكر فى الفلوس".

وحول أزمة عمرو زكي وحازم إمام قال " كل لاعب له حقوق ومستحقات مالية لازم ياخدها، لكن لازم اللاعب يتحمل نادية شويه،والزمالك نادي كبير وكل نادي كبير له حق على اللاعيبة،وهناك لاعبين اشتكت لي بتعرضهم للطرد من الشقق بسبب عدم دفع الاقساط ،ومنهم اللى جايب عربية قسط ومش عارف يدفع باقي تمنها، وكنت أنا وابراهيم بنحاول نحل المشاكل دي على قد ما نقدر،وبدون مساعدة تذكر من إدارة النادي، وحاولت اكتر من مره ادور على رجال اعمال او عضومجلس ادارة فى النادي يساعدنا فى حل المشكل ،لكن دون جدوي، والكل محتاج للمادة لكن اللاعب اللى ما يتحمل النادي فى ازمتة يشوف نادي تاني يروحه".

مؤكدا " نادي الزمالك عاني كتير وصبر على اجهزة فنية وإدارات كتيره،وانا المدير الفني الوحيد اللى جه برغبة الجماهير،وكل اللى كان يهمني رضا الجمهور وفرحته بالفوز،وحبي لجمهور الزمالك مستمر،وكفاية وقفتهم جنبي وتشجيعهم ليه،وعمرهم ما شتموني حتي بعد ما سبتهم ،واتحملت انا وابراهيم كتير عشان خاطر الزمالك،وقضيت موسم ونصف من انجح المواسم فى حياتي ،واعلي نسبة مبيعات لفالنة الزمالك كانت فى الفترة اللى مسكت فيها الفريق،وجه للنادي 9 اعلانات علي التيشرت بدل من اعلان واحد، ومشكلة الزمالك الازلية هي الإدارة والتسويف، واشهد ان الجهاز الفني كان من أخلص الناس ،واحرصهم على خدمة الزمالك".

وحول تدخله لحل مشاكل اللاعبين المادي، ودون دفع أية أموال قال " دي بتبقي خبرة المدير الفني، والثقة من الجمهور والاعلام والادارة، وده اللى بيخلي للمدير الفني قوة فى السيطرة على اللاعبين، وتأجيل إنفلات زمام الأمور، وكان هدفي اني اعرف اللاعب قيمة النادي دوليا وقيم فانلة الفريق،وان الفلوس هتيجي هتيجي".

وعن قوة الاهلي قال " الادارة هناك بتتكتم على اى مشاكل داخل النادي، ولديه منظومة اعلامية قوية، ومصالح تحكم الاعلام الاحمر، لكن هناك نفرقة فى المعاملة بين الاهلي والزمالك".

وأضاف " عمرى ما هحارب النادي الاهلي ، وانا وابراهيم اخدنا حقنا على مدار 22 عام ، حب واحترام من الجمهور، وتاريخ لا ينسي وبطولات خالدة،والجمهور اللى بيشتمنا هم صغار السن اللى ما يعرفوناش".

وحول رغبتة فى إعادة ميدو للزمالك قال" كنت ناوي فعلا ارجعه، لكن ظروف تركي النادي منعت ده،وكان فيه برنامج مجهز لتدريب ميدو ، وكانت عودتة من اولويات الموسم الجديد لو كنت استمريت".